DELTA STATE POLICE COMMAND DON CARRY THEIR OWN CRUSADE GO AGBARHO, ARREST ELEVEN SUSPECTED CULTISTS AND RECOVER TWO PUMP ACTION GUNS AND TEN LIVE CARTRIDGES.
Following the Cult clash between Eiye and Black axe confraternity for Agbarho wey start on the 6/2/2022 wey lead to the death of five persons, The Commissioner of Police Delta State Command, CP Ari Muhammed Ali con direct the Command Anti-Cult Unit (SACU), Dragon Patrol Teams and Police Operatives from Agbarho Division to enter the town go do their own crusade and make sure say those cultists see Watin pass them since them no wan gree use their #iroro.
The DPO of Agbarho Division, CSP Sam Ogwa con lead the team to go do evangelism for the town and during evangelism, them gbab eleven suspected cultist wey dey actively involved for the cult clash wey lead to the death of five persons and recover two Pump action guns, one cut to size locally made gun, eight expanded cartridges and ten rounds of live cartridges.
Right now police don bring The situation under control and more patrol teams don enter the community to forestall any further breakdown of law and order.
Police still don intensify Manhunt for the other cultists wey still dey on the run.
We dey call on all the cultists to come out oh make una no run since una no get sense so make una come face una mates now as government don send federal cultists come for una make una come out come fight. Nonsense taya person.